Institutuko jolastokian egingo ditugu gure esperimentuak. Txosten zientifiko bat idatziko dugu, eta bertan jasoko ditugu esperimentuetan ateratzen ditugun emaitzak.

Jolastokira joango gara kronometro batekin, neurketak egiteko. Bikoteka, elkarri lagunduko diogu neurketak egiten, eta, gero, nork bere koadernoan idatziko ditu. Bost neurketa egin, eta taulan jasoko ditugu.

Ondorioak:

• Emaitzak ikusita, loturarik egin al daiteke denboraren eta distantziaren neurketen artean? Nola? Zer unitatetan neur ditzakegu?
• Espazioa/denbora grafikoa egingo dugu. Zer-nolako lerroa da? Atera dezakegu ondorioren bat?

Aurreko jarduerarekin, abiadura espazioaren eta denboraren araberakoa dela egiaztatu dugu: v= s/t. Halaber, pertsona bakoitzak distantzia jakin bat egiteko denbora gehiago edo gutxiago behar duela ikusi dugu. Orain, etxetik ikastetxera joateko zenbat denbora behar dugun kalkulatuko dugu. Horretarako:

1. Eskala duen plano batean, metrotan neurtuko dugu zer distantzia dagoen gure etxetik ikastetxera, zer kaletatik joaten garen kontuan hartuz.

2.  Dagoeneko badakigu zein den gure batez besteko abiadura; beraz, denbora kalkula dezakegu.

Ondorioak:

• Zenbat denbora behar dugu motel goazenean? Eta azkar goazenean?
• Bat al datoz emaitza teorikoak normalean behar izaten dugun denborarekin? Hala ez bada, zergatik gertatzen da hori?
• Gauza bera al dira azkartasuna eta abiadura?
• Zenbat denbora beharko genuke bide bera bizikletaz egingo bagenu? Kalkuluak egiteko, bizikletaren batez besteko abiadura 20 km/h dela pentsatuko dugu. Unitateak kontuan hartuko ditugu.
• Eta autobusez? Batez besteko abiadura: 17 km /h.