Gazte eleaniztunak : mintzalari eta mintzagai / B. Muguruza Aseginolaza, I. Epelde Zendoia (arg.)

Erreferentzia bibliografikoak jasotzen ditu

Euskal Herriko gazte eleaniztunei buruz dihardute liburu honetako hamalau kapituluek; haien praktika eleaniztunek gurutzatzen dute liburuko atal oro. Gazte eleaniztunen hizkuntza-praktikak eta -ideologiak ikertzeko ikuspuntu ugari azaltzen dira liburu honek biltzen dituen lanetan. Askotan esaten da Euskal Herria hizkuntza-laborategia dela. Agerian geratu da hori, beste behin, eta ezin hobeto baliatu dute gure laborategi hau liburuan parte hartu duten egileek. Uste dugu denon artean ekarpen interesgarria egin diogula berez emankorra den arloari, eta hari-mutur asko bistan utzi dituela, inork etorkizunean heldu nahiko balie ere. Aldi berean, balio digu ikasteko zein diren gazteak eta hizkuntzak ardatz hartuta lanean ari diren ikertzaileen egungo hainbat iker-lerro. Ardatz nagusia gazte eleaniztunak dira, eta bereziki gazteen sare sozialetako hizkuntza-praktikak. Ikuspegi lokalaren eta globalaren arteko tentsioa antzematen da, Europako beste testuinguru askotan bezala, Euskal Herriko gazteen artean ere. Euskara hizkuntza gutxitua da, eta bertako erdarekin, ingelesarekin, eta beste hizkuntza askorekin batera bizi da xxi. mendeko Euskal Herrian. Horri lotuta, euskararen estandarizazio berantiarra dela batetik, euskararen hizkuntza gutxitu izaera dela bestetik, aldaera estandarraren eta tokiko aldaeraren arteko harreman maiz konplexuei ere begiratu nahi die. Euskal Herriko zenbait unibertsitatetako ikertzaileek hartu dute parte liburu honetan, eta Euskal Herriko zenbait unibertsitate dira ikerketen kokaguneetako batzuk, baita eskolak eta beste esparru batzuk ere, irakurleak frogatu ahal izango duen bezala.

Testuak euskaraz eta ingelesez