Aurkezpena

PROPOSAMENA TESTUINGURUAN KOKATZEA

Iturria: http://mateareablog.blogspot.com/

PROPOSAMENA TESTUINGURUAN KOKATZEA Sekuentzia didaktiko honen helburuak dira ikasleek errealitateko angeluak identifikatzea, haien zabalera iritzira kalkulatzea, eta nola neurtu behar diren ikastea, angelu garraiagailua nahiz matematika-morroiak erabiliz. Kontzeptu teorikoak errazak dira, alabaina, praktika behar da haiek errealitatean identifikatzeko. Hori dela eta, praktikatu egin behar dugu, betiko moduan angelu-garraiagailua erabiliz, nahiz jardueretan adierazitako simulagailuak baliatuz. Jardun horiek biak osagarriak dira, eta kontzeptuak finkatzen laguntzen dute; bai eta angeluak identifikatzen eta haien garrantzia bizitzan aintzat hartzen ere: orientazioan, zientzian, teknikan…

JARDUEREN SEGIDA

A etapa - Sarrera

• 1. jarduera. Angeluen sailkapenak aurkezten dira, eta grafikoki zehazten dira mota ohikoenak. Aplikazio bat erabil daiteke angeluak marrazteko, angeluaren zabalera aldatu ahala haren zenbakizko balioa ikusteko, eta zer motatakoa den jakiteko. Ondoren, zenbait jarduera proposatzen dira, angelu ohikoenak iritzira kalkulatzeko (15º, 30º, 45º…), eta zehatz neurtzeko, garraiagailuak edo Interneteko simulagailuak erabiliz. Bukatzeko, angeluen balioak kalkulatzen dira zenbait egoeratan (elkar ebakitzen duten zuzenen artekoak, triangeluetakoak...).

B etapa – Garapena

• 2. jarduera. Erleen dantza oinarri hartuta, eta fenomenoa irudien eta bideoen bidez azaldu ostean, grafiko batzuk interpretatuko dira. Grafiko horietan egoera zehatzak adierazten dira, loreen erlauntzarekiko kokapenari lotuta; bai eta erleek nektar- eta polen-iturrien kokapena erlauntzan azaltzeko egingo duten dantzari lotuta ere. Lotura aldebikoa da: dantzarena kokapen zehatz batekin, eta alderantziz, kokapen batena dantza zehatz batekin.

C etapa – Bukaera eta ebaluazioa

• 3. jarduera. Angeluak erabiltzen dira hiri bateko ibilbideen testuinguruan. Angeluen erabilerak deskribapenen zehaztasuna hobetzen eta anbiguotasunak argitzen laguntzen du. Ibilbideen deskribapenak interpretatuko dira, eta mapa birtualetan identifikatuko. Eta alderantziz, mapetan adierazitako ibilbideak ohiko hizkuntzan deskribatuko dira, angeluak eta haien deskribapen zehatza erabilita.

Ibilbidea

Gida honek atal hauek ditu:

• Orientabide metodologikoak. Gomendioak irakasleak jarduerak egin ditzan, erantzunak eta baliabideak.

• Programazioa:

  Arloaren gaitasunak.

  IKT gaitasunak.

  Ikasketa-helburuak eta edukiak.

  Ebaluazio-irizpideak.

• Material honi buruz. Proiektuaren oinarriak datoz, sekuentzia didaktikoen oinarri den ikuskera teorikoa eta materiala erabiltzeko eta deskargatzeko gida.