Aurkezpena

PROPOSAMENA TESTUINGURUAN KOKATZEA

Proposamenaren muina higiezinen agentzia baten eskariari erantzutean datza. Agentziak alokairuan eta salmentan jarritako etxebizitza batzuen azalera-neurrien kalkulua egiteko zeregina eman die ikasleei. Fikziozko egoera horretan, ikasleek laukizuzenen azalerak kalkulatzen ikasiko dute, eta ondoren, ezagutza horietaz baliatuko dira etxebizitzen eta pisuen azalerak kalkulatzeko. Proposamenaren bukaeran, iragarki bat egin beharko dute, 7 etxebizitza salmentan jartzeko. Iragarkian, xehetasun teknikoen berri eman beharko dute, higiezinen agentziek egiten duten bezala.

JARDUEREN SEGIDA

Proposatutako jardueretan, ikasleek higiezinen agentzia bateko arduradunen egitekoa bete beharko dute; hots, zenbait etxebizitza eta pisuren datuak lortu beharko dituzte, alokairuan eta salmentan jarri ahal izateko. Azkenik, iragarki batzuk diseinatu beharko dituzte, etxebizitzak eta pisuak salgai jartzeko. Higiezinen agentziaren webgunean jarri beharko dituzte.

A etapa. Sarrera.
Laukizuzenen azalerak neurtzeko erabiltzen diren prozedurak ulertu eta kalkulu errazak egin.

B etapa. Garapena.
Azalerak neurtu, etxebizitza eta pisuen planoetan oinarrituta, poligonoak beste irudi soilago batzuetan deskonposatuz.

C etapa . Bukaera eta ebaluazioa
Etxebizitzek eta pisuek zenbateko azalera duten neurtu, poligonoak deskonposatuz, eta jabetzak saltzeko iragarkiak egin.

• Arloa: : Matematika
• Gaia: Azalera-neurriak.
• Unitate didaktikoa: Azalerak
• Maila: Lehen Hezkuntzako 5. maila
• Saio kopurua: 3

Ibilbidea

Gida honek atal hauek ditu:

• Orientabide metodologikoak. Gomendioak, irakasleak jarduerak egin ditzan, erantzunak eta baliabideak.

• Programazioa:

  Arloko gaitasunak.

  IKT gaitasunak.

  Ikasketa-helburuak eta edukiak.

  Ebaluazio-irizpideak.

• Material honi buruz. Proiektuaren oinarriak datoz, sekuentzia didaktikoen oinarri den ikuskera teorikoa eta materiala erabiltzeko eta deskargatzeko gida bat.